FRIDAY

21st Sep 2018

GET MY HOROSCOPE

app
Download
【連載:乃木坂46西野七瀨之nanase-self】-閃耀
29.07.2018

憧憬、著迷。

令七瀨目光閃耀嘅時刻係?

 

閃耀

自我評價嘅時候,我對自己相當嚴格。

離我越遠嘅,我就覺得越耀眼。

Top/ROYAL PARTY

Pants with belt/COCO DEAL

Earrings/ADASTRIA (Me%)


最新嘅嗜好,係動畫製作!

現在,令我非常入迷嘅,係動畫製作。雖然話係動畫,其實只係行緊嘅畫面之類簡單嘢(笑)。然而,單單係用輕觸式筆畫出流暢嘅行路動作,都唔容易。我會一邊查住行路係點郁,一邊畫,總之先將整成動畫,當覺得有邊度唔妥嘅時候先會再調整動作……咁樣一步步完成。慢慢學習,最終整到似模似樣嘅動畫係我目標!

我係對於越遙遠嘅嘢,就越覺得耀眼嘅類型。唔知係咪因為咁,對於出演外國電影嘅男女演員,我經常覺得佢哋特別有魅力。我最近睇The Greatest Showman(大樂家)》,裡面嘅主演Hugh Jackman嘅演技以及故事……成部作品超級正,正到令我即刻買咗電影原聲音樂!同時令我感受到由一部作品得到滿足感嘅感覺。其實,一開始係飯豊Marie (まりえ) 約我一齊去睇呢套戲嘅,但由於夾唔到行程,最後只好各自去睇。然而,如果當初Marie冇約我,我可能會錯過呢部作品。好多謝佢約我睇。

我閃耀嘅瞬間,如果係喺舞台上嘅時候就好喇……。但因為我好少有機會可以見到舞台上嘅自己,所以老實講我都唔係好清楚。因為工作而影低嘅相,當遇到我好鍾意嘅相嘅時候,我都會將佢儲存落手機。但係,我咁做嘅頻率都唔高,所以我對自己可能都幾嚴格。

喺外國嘅自由時間=耳環嘅出場機會

我覺得閃令令嘅小物好可愛,但實際上身邊有嘅,只有媽媽放喺我間房嘅金色生肖擺設(笑),同埋寥寥可數嘅飾物。每當我遇到啱心意嘅耳環時,我都會不期然買咗落嚟,但就好少機會用到。如果戴住去做嘢,換衫時好容易會整唔見對耳環,整唔見咗又會好傷心,而且我去另一個地方時成日都會戴住耳機,再加上頭髮嘅毛躁,感覺耳仔範圍會好亂(笑)。所以我嘅耳環可以派上用場嘅場合,就係去外國做嘢嘅時候!喺空閒時間同成員一齊著私服出去玩,係我少有可以享受戴耳環嘅機會。

同時裝雜誌工作人員一齊做嘢時,我會比平時更注重打扮。一諗到要同各位從事時尚行業嘅工作人員見面,雖然只係微小嘅變化,但我會比平時更用心配搭服裝。購物……一如以往地喺網上買嘢比較多(笑)。對於拖鞋,我會經常Check住有冇可愛嘅款,然後加入我嘅購物清單,當平時用緊嘅拖鞋舊咗,就會喺個清單度揀嚟買。入咗清單嘅期間如果突然變成減價品嘅話,感覺好似賺咗

前排,媽媽話我唔執廚房,而以此為契機(笑),我買咗一個大餐具櫃。以前因為冇位擺而要周圍擺嘅嘢,而家全部都可以收晒入去,執到整整齊齊,成個空間突然變得清爽,距離明亮乾淨嘅房間又邁進咗一大步。之後,同媽媽一齊去電器舖,順勢換埋用咗好多年嘅雪櫃。喺只要輕觸一下對門就會自動打開嘅最新型雪櫃面前,我哋兩個人都好感動!最近,目光最亮嘅瞬間可能係出自呢度(笑)。


為配合主題,「Doiya-san」識七十二變!

本月之nanase-sense

覺得呢個顏色同型狀,如果做成閃令令嘅擺設嘅話會好可愛,所以嘗試畫咗出嚟。好想用嚟裝飾擺儲錢箱同護身符嘅地方。

Doiya-san=平時冇乜表情,雙眼閃耀嘅時候並唔係因為感情浮動,而係因為太陽嘅折射。


Model/西野七瀨 Photo/藤井由依 (Roaster) Hair & Make up/KITA (Nord) Stylist/松尾由美 Text/吉川由希子

Load more