SATURDAY

16th Dec 2017

GET MY HOROSCOPE

app
Download
【連載:乃木坂46西野七瀨之nanase-self】-計劃
27.08.2017

同團員去完南方島嶼旅行嘅七瀨,同時發表今個夏天令人期待嘅計劃


#「計劃」

出海、去泳池、做瑜珈!多得擅長擬定計劃嘅團員,先可以玩得咁開心

One-piece (with belt)/Rirandture
Earrings/Osewaya (Osewaya)
Suitcase/Jewelna Rose東急Plaza表參道原宿店
Sunglasses/NADIA FLORES EN EL CORAZON
Boater/ROYAL PARTYSneakers/CONVERSE Information centre 


為咗寫烹飪Blog而添置成熟風嘅廚房器皿!

最近我成功實踐嘅計劃,就係同乃木坂46嘅成員伊藤Karin(伊藤かりん)、川後陽菜同齊藤優里(斉藤優里)一齊去咗沖繩旅行!起初我知道咗幾時有得放假嘅時候,係打算自己一個逗留喺箱根附近嘅(笑)。不過諗下既然咁難得,我都好想同熟嘅幾位成員去遠啲玩,一問之下發現大家同一個時期都有假放。我之前已經有留意開竹富島,於是我提議不如去嗰度啦,然後大家都贊成,就係咁樣我地落實咗三日兩夜嘅旅程。同上次新年去香港旅行嗰陣一樣,擅長計劃行程嘅Karin今次都好落力!唔單止將我地想去嘅地方例如餐廳同影相位都編哂入行程,仲搵埋喺觀光嘅時候可以寄存行李嘅地方,簡直係完美(笑)。期間我地去咗一間好精緻嘅Cafe,買咗唔同顏色嘅玻璃製品留念。最後一晚行程安排得好緊密,食飯之後去行海邊,然後去住嗰度嘅泳池,再喺星空之下做瑜珈,最後返房用啤牌決定沖涼嘅次序……不過因為大家都太攰啦,所以連啤牌都冇玩到(笑)。如果一個人旅行的話,以咁消極嘅我嚟講,應該唔能夠過得咁充實。多得其他成員,令到呢個旅行咁難忘

23歲嘅抱負,就係喺每個月嘅23號左右,將用心煮好嘅嘢食上載到Blog。我5月份出世嘅,就喺5月嗰陣我出席咗個廣播節目,有聽眾提出咗剛才提到嘅建議,聽落嘅時候我覺得「好似可以為自己做啲嘢咁,而且我又純粹想試下挑戰!」,於是我決定採納呢個提議。比起決定第一次煮咩好,首先要預備嘅係新嘅器皿!因為我怕打爛,其實一直以來都係用緊塑膠製嘅器皿。當我諗到有啲器皿可以令到食物睇落更吸引,於是叫埋父母同我一齊去買。我買咗嘅多數都係灰色或深藍色呢啲冷色系嘅碟,咩料理都可以襯得好靚,我愈來愈期待入廚房啦。

打造理想中房間,絕對唔少得家人嘅幫忙

而私人方面,我逐步進行緊房間改造計劃。首先,我想將牆身顏色由純白變到好似外國時尚房間嗰啲帶藍調嘅灰色,於是近排打算請爸爸幫手貼牆紙。咁耐以嚟爸爸仲幫我挑選放喺房做裝飾嘅觀賞植物、為免塊全身鏡跌落嚟而用伸縮棒固定好,好落力!而媽媽就主力幫手打掃房間同整理衣櫃。呢個房間改造計劃,好多事情上如果冇佢地幫手都係搞唔掂㗎。不過,爸爸鍾意DIY,媽媽又鍾意打掃,我諗佢地唔覺得辛苦嘅……懷住呢個想法,我地三個人繼續努力打造理想房間!

今個夏天,想實現嘅事就係去煙花大會。喺我心目中最厲害嘅行程計劃專家Karin,其實佢都好了解浴衣嘅着法㗎。如果可以由Karin幫我着浴衣,然後一齊去睇煙花,一定會係個好美好嘅夏日回憶到咗9月,我擔任主角嘅電影薙刀社青春日記(あさひなぐ)就會上映。去戲院睇亦係我期待嘅事情之一,不過到時我一定會覺得超級難為情,我打算喺試映會嘅時候習慣下上大銀幕嘅自己(笑)。


為大家送上四季之「Doiya-san」!

本月之nanase-sense

平時放假,鍾意喺屋企悠悠閒閒咁過,唔會諗行程。不過最近,我打算挑戰好想試嘅酵素浸浴!

Doiya-san=毫無計劃嘅類型。今個夏天,打算隨心所欲咁出門。


Model/西野七瀨 Photo/風香 (LOVABLE) Hair & Makeup/KITA (Nord) Stylist/松尾由美 Text/吉川由希子 Support/EASE

Load more