MONDAY

22nd Jan 2018

GET MY HOROSCOPE

app
Download
【連載:乃木坂46西野七瀨之nanase-self】-裝飾
24.12.2017

喺呢個季節,無論係街上嘅景色,定係行人嘅裝扮,都會變得華麗。點綴七瀨周圍嘅係?


#「裝飾」

細細個嘅聖誕老人、生肖公仔等等。

媽媽帶俾我嘅擺設係轉季嘅信號。

Knit/NADIA FLORES EN EL CORAZON 

Bustier (as a set with the blouse)/RENAI KEIKAKU LUMINE EAST EST新宿店


鍾意留喺室內、怕生嘅人,連美甲店都覺得好遠?!

櫥窗裡面嘅擺設換上聖誕主題,街上面會有發光嘅燈飾,咁樣嘅冬天係我一年之中最鍾意嘅季節。喺大阪老家住個陣,每年一近聖誕節,我記得客廳會擺一棵大約1米高嘅聖誕樹,鋼琴上面又會擺一棵迷你版聖誕樹。而且,露台上會有個以3個聖誕老人爬緊樓梯嘅情景為造型嘅燈飾。呢啲全部都係鍾意鉅細無遺咁佈置屋企嘅媽媽嘅功勞!自從我開始一個人生活之後,喺我出咗去個陣,我媽媽時不時會上我屋企,用符合當時季節嘅小飾物裝飾我間屋。聖誕節會擺馴鹿同聖誕老人嘅小裝飾品,新年就會擺生肖公仔。將每一個角落都佈置得太過精緻嘅話,反而會覺得「睇到嘅只係得我咋喎」而覺得有少少寂寞(笑)。對我嚟講,媽媽不經意地擺低嘅擺設,令我享受到恰到好處嘅季節感。

唔知係咪因為似媽媽,我都好鍾意行賣室內擺設嘅舖頭同雜貨店,簡直係幸福到極點♡ 廚房用品呀浴室用品呀單單可以一次過睇晒唔同種類嘅商品都令我覺得好安心(笑)。最近搵緊嘅係,可以點綴我間行簡約風嘅房嘅金色小飾物。講到金色,佢令我諗返起唔知幾多年前返老家嘅時候,突然見到鞋櫃上面裝飾咗一個金色嘅動物,令我好驚訝嘅經歷!我向媽媽問起呢樣野,佢答我「聽講喺門口擺個金色嘅野會令間屋風水好啲呀嘛」……我個時明明唔鍾意,但宜家我竟然都開始搵金色嘅飾物,只可以話我哋不愧係兩母女(笑)。

裝飾自己=化妝、美甲,而呢啲我幾乎只會因為工作需要而做。最近,我發現自己搽胭脂嘅話個人會睇落細個啲,所以最近好鍾意唔搽胭脂。至於美甲方面,直到宜家為止,我人生中只係搽過兩次指甲油!其中一次係喺高中文化祭嘅時候。對指甲油零興趣嘅我,一枝指甲油都冇,所以只好去媽媽有嘅指甲油度揀(笑)。就算宜家大個咗,對我嚟講,與其話美甲係可愛,不如話係麻煩。雖然我覺得會去美甲店整到對手靚一靚嘅女生好正,好令我嚮往,但一諗到「假期專登出去美甲店,仲要同美甲師傾偈」,對我呢個只想宅喺屋企、怕生嘅人嚟講, 難度似乎太高喇(笑)。

用「大人版」嘅貼紙簿紀錄回憶

我對將身邊嘅野都用閃石裝飾嘅「裝飾熱潮」冇咩興趣,我唯一沉迷過嘅只有收集貼紙。小學低年級嘅時候,用我鍾意嘅貼紙裝飾到好漲嘅兩本貼紙簿係我嘅寶物。裡面有珍貴嘅毛茸茸質地嘅貼紙,又有帶膠珠嘅貼紙……真係好懷念!同媽媽去完超市,回程個陣,每次都會去雜貨店買貼紙。新款嘅貼紙首先會放入去貼紙簿,然後帶去同朋友嘅聚會。大家互相交換嚟睇吓,交換吓,唔經唔覺時間就過去(笑)。唔知係咪當時嘅習慣留咗落嚟,我宜家都仲係好鍾意貼紙類嘅野。我用嚟擺野嘅File係黑色嘅,睇落有啲寡,所以我會用唔同種類嘅貼紙去裝飾佢。買完衫之後收到嘅野,上嘅電視節目嘅Logo等等對我嚟講,真係一本充滿回憶嘅「大人版」嘅貼紙簿!


為咗配合主題,「Doiya-san」識七十二變!

本月之nanase-sense

變成花瓶種花嘅Doiya-san(笑)。宜家仲係花蕾,之後究竟會結出咩花呢,呢個就係我一路期待一路等嘅樣

★Doiya-san=冇啱身嘅衫,所以想打扮嘅時候帽同鞋等小物就係重點!


Model/西野七瀨 Photo/寺田茉布 (LOVABLE) Hair & Makeup/KITA (Nord) Stylist/松尾由美 Text/吉川由希子

Load more