WEDNESDAY

20th Jun 2018

GET MY HOROSCOPE

app
Download
【連載:乃木坂46西野七瀨之nanase-self】-滿足
21.01.2018

冬日來臨,假日就會變得更充實!

今次就嚟調查有咩會令七瀨覺得滿足♡


#「滿足」

冬天,我會同屋企人一齊圍住食火鍋。

呢個習慣就算離開咗大阪都冇變過,每次都覺得好溫暖。

Pajama set (Shirt, pants, eye mask) (PEACH JOHN ROOM)/PEACH JOHN

Slippers (Bedroom Athletics)/PEACH JOHN


遊戲過關令我有變成大人嘅感覺……

夏天過去,天氣越嚟越涼嘅季節,就係鍾意宅喺屋企嘅我一年之中最有幹勁嘅時期!睇吓戲、睇吓舞台劇、屋企人揸車一齊去Outlet mall、去睇SPITZ(スピッツ)演唱會,日子過得好充實。最近,一個人散步一個鐘嘅經歷都好開心!嗰一日唔知點解好想行路,搵好行去目的地嘅路徑之後,就決定行到滿足為止。然而,行到一半左右,突然落起大雨,我唯有無奈地中止呢個計劃。明明前半段,心情超好,仲啍住歌行,但結果居然係咁,真係傷心。呢種散步方式可以令我心情轉好,有機會我都想再行去其他唔同地方睇吓。另外我都好憧憬去鄉下地方,嚟一個小旅行。呢個時期嘅我,少有地好積極,如果有明確嘅目的:「我想去呢度做呢樣嘢!」嘅話,似乎無論去邊都可以即刻起行(笑)。

當然,喺屋企嘅時間都同樣充實,最近我好迷「Super Mario Odyssey」(スーパーマリオ オデッセイ)呢個遊戲。咁啱發售後第二日係假期,所以我就將個日用晒嚟打機,最後仲打爆機!當時睇到淨係爆咗機先睇到嘅結幕畫面,覺得感動嘅同時,又有變成大人嘅感觸。宜家唔單止可以將時間用喺打機上,最重要嘅係感受到自己嘅技術有所提升。明明細個個陣打機更多,但打爆機嘅次數真係寥寥可數。打爆「Super Mario Odyssey」之後仲有好多要做嘅事,宜家我逐樣計劃緊!


冬天,食爸爸親手整嘅雞肉丸子食到飽一飽♡

講到可以滿足我個胃嘅冬天定番美食,就必定係同屋企人圍埋一齊食嘅雞肉蔬菜鍋。我一直都好鍾意爸爸整嘅塞滿蒜頭嘅雞肉丸子,所以前一個冬天同屋企人齊聚喺屋企一齊食。唔係我話,我一家人感情都好好(笑)。宜家我喺東京一個人生活,食火鍋嘅時候,諗起可以好似喺老家個陣咁過冬真係好正,覺得好溫暖。話說,前排要喺電視節目上介紹自家風味嘅火鍋,令我有機會問爸爸雞肉丸子點整。然後,最重要嘅份量部份,爸爸竟然只係寫「多啲」呀「一般」之類(笑)。雖然係咁,但為咗盡量貼近原本個味,我努力試咗好多次,最後終於成功呈現到!

每次遇到美景同罕有物,我都會即刻影低。所以我嘅手機相冊裡面,有由Outlet mall望到嘅富士山、喺香川某幢樓天台上見到嘅夕陽、喺北九州見到嘅波浪形雲朵等等嘅相。感覺鄉下地方嘅天空比起東京嘅更高更闊,所以我喺嗰度影靚景嘅次數更多。呀,宜家返睇啲相,記起有次下雨天見到玻璃窗上面凝結咗水氣,我不期然喺上面寫咗「怖」字,但因為點影都影唔好而重新整咗6次(笑)。另外仲有啲不可思議嘅相,譬如有一張超現實主義嘅相──香蕉皮放喺紙杯裡面。呢張相,係以前我有一次喺休息室咁做,伊藤万理華睇到覺得鍾意,然後將佢影低Send俾我而得嚟。再睇返,覺得張相別有一番味道,係我宜家最愛嘅一張相!



為咗配合主題,「Doiya-san」識七十二變!

本月之nanase-sense♡

充滿身體裡面嘅係精力!?一路喺網上查「液體 畫畫方法」一路試畫,真係好難!好想再學習畫畫。

★Doiya-san= 喺晴天進行光合作用。但並唔係為滿足心靈而做,而係維持生命嘅必需品。


Model/西野七瀨 Photo/熊木優 (io) Hair & Makeup/KITA (Nord) Stylist/松尾由美 Text/吉川由希子 Support/アワビーズ

Load more