SATURDAY

16th Dec 2017

GET MY HOROSCOPE

app
Download
【連載:乃木坂46西野七瀨之nanase-self】冒險精神
25.06.2017

【連載:乃木坂46西野七瀨之nanase-self

身處陌生環境、從未到訪嘅街道,就快踏入23歲嘅七瀨,將會面對點嘅未來呢?


#「冒險」

帶住不安進入電影世界,一個一個「真係冇問題?」嘅疑惑都轉化為「好開心!」嘅心情。

Lace gownCamisole one-piece/BEAMS WOMEN澀谷 (Ray BEAMS

T-shirt/EMODA LUMINE EST新宿店

Earring/Osewaya


拍攝現場非常充實,慶幸能夠接觸薙刀

自從加入乃木坂46,發展事業嗰時起,拍電影就成為咗我嘅目標之一。當知道自己有份參演電影「Asahinagu(あさひなぐ)」(日本預定於922日上映)嘅時候,我真係非常開心!不過,了解到自己要擔任女主角嘅同時又會諗「自己得唔得㗎?」(笑)我本身就好鍾意一班人去完成一件事嘅過程,例如係拍MV或劇集,所以我會想像「咁拍電影又係點㗎呢?」,令我愈嚟愈期待開拍。而喺電影開拍之後,片場之中充滿歡樂,甚至覺得可以一直拍落去。另外,監製係一位好有趣嘅人!佢自認係我擔任嘅角色-旭嘅前輩・真春嘅朋友……其實呢個係連漫畫原著同電影之中都冇登場過嘅虛構人物,因為有佢嘅原故,現場氣氛都好輕鬆(笑)。

電影中所提及嘅薙刀,係整套電影嘅主題,對於未接觸過嘅我而言同時亦係一大難題。喺電影開拍之前,我花咗大概一個月時間進行薙刀練習。剛開始嘅時間,身體唔可以好順利咁做動作,內心有種「我做唔做得到㗎?」嘅不安。而且裝備有一定嘅重量,過程中特別困難嘅係手腕嘅擺動。當我不斷重複練習,突然有一日唔再覺得沈重,呢個就係我學識咗操縱薙刀嘅證據。即使係睇人對戰,當我知道人地點樣運用策略應對,而取勝嘅時候每個人所發出嘅聲音都係完全唔同又充滿個性,令我漸漸發現薙刀嘅樂趣。我衷心慶幸能夠認識薙刀呢項競技,如果有更多人可以透過電影而對薙刀產生興趣的話,實在太好啦。從演出層面而言,係有搞笑場面嘅。既然要拍就當然希望令大家笑啦,所以我都鼓起勇氣,嘗試去做出平時唔會做嘅認真表情!喺電影入面,大家會睇到我好少見嘅一面(笑)。  

發現令我在意嘅路的話,就會唔行唔得!

我覺得自己幾有冒險精神㗎。初中嘅時候好鍾意踩單車去遠嘅地方,例如同朋友決定好「我地去山嘅嗰邊呀!」,就會挑戰踩斜路。我仲記得我由返小學之前就開始返咗十年鋼琴班,嗰度嘅景色會激發起我嘅冒險心。學琴嘅地方既係教室,同時又係老師屋企,行去琴房嘅途中有條通上二樓嘅樓梯,呢條蓋上黃綠色地氈嘅樓梯唔知點解就係好吸引我(笑)。即使係而家,如果行街嘅時候發現到我有興趣嘅小巷的話,就會不自覺咁興奮起嚟,好想去行。而我最近期嘅一次「冒險」,就係買大量電子漫畫。喺搵緊有趣漫畫嘅時候,偶然發現到一套令我沈迷嘅科幻作品-「Imuri(イムリ)」。

5月25號係我嘅23歲生日。回想返22歲,有嘅只係值得開心嘅事!例如第一次單獨做non-no封面、出寫真集、有份參與我夢寐以求嘅節目「另一天空(アナザースカイ)」等等。踏入23歲,希望可以有更多演戲嘅機會。人愈大,對工作嘅態度會出現轉變,但平時嘅我就冇咩改變。例如鐘意食嘢呢個特質,由我十幾歲到而家都冇變過,而且我每日都想食肉……(笑)。我而家比以前更「享受每一餐」,甚至變得有啲貪心添。食係我人生嘅動力,我相信今後都唔會變(笑)。


為你送上四季之「Doiya-san」!

本月之nanase-sense

如果Doiya-san上下啪一聲咁分開……?我會畫成俄羅斯娃娃咁樣。同季節係冇關聯嘅。

Doiya-san=唔會冒險。不過有興趣去可以接觸動物嘅地方旅行。


Model/西野七瀨 Photo/風香 (LOVABLE) Hair & Makeup/KITA (Nord) Stylist/松尾由美 Text/吉川由希子

Load more