TUESDAY

20th Feb 2018

GET MY HOROSCOPE

app
Download
本田翼
non-no MODEL
【連載 : 歡迎來臨本田翼俱樂部】-「我鍾意憑興趣喺拍攝現場自發地學習」
11.02.2018

Shirt/Lily Brown

Wide pants/COCO DEAL

Glasses/POKER FACE (tana-gokoro)

Shoes/moda Clea (MARGARET HOWELL idea)


我好討厭被強迫去學習,但就鍾意學習一啲自己有興趣嘅嘢。當中最具代表性嘅例子就係打機。

例如玩「魔法氣泡(ぷよぷよ)」過唔到關嘅時候,我就會轉去對戰模式。完全放棄戰鬥,淨係觀察對方嘅戰鬥模式,然後將觀察到嘅嘢應用喺下一次嘅對戰中……。「究竟點樣先可以嬴到?」一次又一次嘅試驗,呢個過程已經唔係玩,而係學緊嘢。

另外,對我而言,同人溝通都係一種學習。每次加入新拍攝嘅時候,我都會衡量點樣可以保持到自己嘅節奏同埋估計一下輕唔輕鬆,然後取個平衡。我咁做並唔係想偷懶,而係學習緊。

最近,令我感興趣而又學緊嘅,就係打野戰!!前排,受到朋友邀請,第一次參加。佢地教我嘅,就只有「被子彈射中個陣要即刻自己大叫“Hit」呢條最基本嘅規則。然後就係我呢個新手混喺芸芸高手之中,盡全力去學嘢(笑)。

然而,我覺得呢種學習方式對我嚟講啱啱好。我好唔鍾意人地由一開始一步一步咁教。做咩都好,總之試咗先,然後喺試嘅過程中自己學習。畢竟我係一個做咩之前都完全唔睇說明書嘅人(笑)。

相比起坐喺書枱前面打開本書學習,我更鍾意落手落腳去學、去體驗。如果學校嘅教學係咁,我諗我嘅成績會好好(笑)。


TSUBASA EPISODE

最近熱衷於學習嘅本田翼嘅學習二三事。


「翼English

我幾鍾意英文,所以以前我嘅英文成績都唔錯,但講到打從心裡覺得學英文係開心嘅話,就係由可以去外國開始。果然英文都係喺海外學比較開心。譬如,通過觀察其他人嘅反應,學到喺咩時候要講「Amazing!」。由模仿他人開始學習英文,係我嘅慣常做法。亦係我擅長做嘅事(笑)。


「唯一鍾意嘅教科書」

雖然我好討厭打開本教科書溫書,但我唯一鍾意嘅教科書,就係日本史。裡面匯聚發生喺日本呢個小小島國嘅故事,令我非常有興趣咁睇晒。但一旦去到同世界接軌嘅部份,對我嚟講就Over晒,日本史應該係去到美國海軍馬修・培理坐黑船嚟到日本為止。我覺得之後嘅歷史都應該計入世界史!


Model/本田翼 Photo/藤原宏 (Pygmy Company)  Hair & Makeup/中山友恵 (Three PEACE) Stylist/松尾正美 Text/石井美輪


Load more